ആധ്യാത്മിക-ജ്ഞാന-സംഗ്രഹ

ശ്രീ-കൃഷ്ണ-സഹസ്ത്രനാമ-സ്തോത്ര

॥ ശ്രീകൃഷ്ണായ നമഃ ॥

ധ്യാനമ്
ശിഖിമുകുടവിശേഷം നീലപദ്മാങ്ഗദേശം
വിധുമുഖകൃതകേശം കൌസ്തുഭാപീതവേശമ് ।
മധുരരവകലേശം ശം ഭജേ ഭ്രാതുശേഷം
വ്രജജനവനിതേശം മാധവം രാധികേശമ് ॥
സ്തോത്രമ്
കൃഷ്ണഃ ശ്രീവല്ലഭഃ ശാര്ങ്ഗീ വിഷ്വക്സേനഃ സ്വസിദ്ധിദഃ ।
ക്ഷീരോദധാമാ വ്യൂഹേശഃ ശേഷശായീ ജഗന്മയഃ ॥ ൧ ॥
ഭക്തിഗമ്യസ്ത്രയീമൂര്തിര്ഭാരാര്തവസുധാസ്തുതഃ ।
ദേവദേവോ ദയാസിന്ധുര്ദേവോ ദേവശിഖാമണിഃ ॥ ൨ ॥
സുഖഭാവഃ സുഖാധാരോ മുകുന്ദോ മുദിതാശയഃ ।
അവിക്രിയഃ ക്രിയാമൂര്തിരധ്യാത്മസ്വസ്വരൂപവാന് ॥ ൩ ॥
ശിഷ്ടാഭിലക്ഷ്യോ ഭൂതാത്മാ ധര്മത്രാണാര്ഥചേഷ്ടിതഃ ।
അന്തര്യാമീ കലാരൂപഃ കാലാവയവസാക്ഷികഃ ॥ ൪ ॥
വസുധായാസഹരണോ നാരദപ്രേരണോന്മുഖഃ ।
പ്രഭൂഷ്ണുര്നാരദോദ്ഗീതോ ലോകരക്ഷാപരായണഃ ॥ ൫ ॥
രൌഹിണേയകൃതാനന്ദോ യോഗജ്ഞാനനിയോജകഃ ।
മഹാഗുഹാന്തര്നിക്ഷിപ്തഃ പുരാണവപുരാത്മവാന് ॥ ൬ ॥
ശൂരവംശൈകധീഃ ശൌരിഃ കംസശംകാവിഷാദകൃത് ।
വസുദേവോല്ലസച്ഛാക്തിര്ദേവക്യഷ്ടമഗര്ഭഗഃ ॥ ൭ ॥
വസുദേവസുതഃ ശ്രീമാന് ദേവകീനന്ദനോ ഹരിഃ ।
ആശ്ചര്യബാലഃ ശ്രീവത്സലക്ഷ്മവക്ഷാശ്ചതുര്ഭുജഃ ॥ ൮ ॥
സ്വഭാവോത്കൃഷ്ടസദ്ഭാവഃ കൃഷ്ണാഷ്ടമ്യന്തസമ്ഭവഃ ।
പ്രാജാപത്യര്ക്ഷസമ്ഭൂതോ നിശീഥസമയോദിതഃ ॥ ൯ ॥
ശംഖചക്രഗദാപദ്മപാണിഃ പദ്മനിഭേക്ഷണഃ ।
കിരീടീ കൌസ്തുഭോരസ്കഃ സ്ഫുരന്മകരകുണ്ഡലഃ ॥ ൧൦ ॥
പീതവാസാ ഘനശ്യാമഃ കുഞ്ചിതാഞ്ചിതകുന്തലഃ ।
സുവ്യക്തവ്യക്താഭരണഃ സൂതികാഗൃഹഭൂഷണഃ ॥ ൧൧ ॥
കാരാഗാരാന്ധകാരഘ്നഃ പിതൃപ്രാഗ്ജന്മസൂചകഃ ।
വസുദേവസ്തുതഃ സ്തോത്രം താപത്രയനിവാരണഃ ॥ ൧൨ ॥
നിരവദ്യഃ ക്രിയാമൂര്തിര്ന്യായവാക്യനിയോജകഃ ।
അദൃഷ്ടചേഷ്ടഃ കൂടസ്ഥോ ധൃതലൌകികവിഗ്രഹഃ ॥ ൧൩ ॥
മഹര്ഷിമാനസോല്ലാസോ മഹീമങ്ഗലദായകഃ ।
സംതോഷിതസുരവ്രാതഃ സാധുചിത്തപ്രസാദകഃ ॥ ൧൪ ॥
ജനകോപായനിര്ദേഷ്ടാ ദേവകീനയനോത്സവഃ ।
പിതൃപാണിപരിഷ്കാരോ മോഹിതാഗാരരക്ഷകഃ ॥ ൧൫ ॥
സ്വശക്ത്യുദ്ധാടിതാശേഷകപാടഃ പിതൃവാഹകഃ ।
ശേഷോരഗഫണാച്ഛത്രഃ ശേഷോക്താഖ്യാസഹസ്ത്രകഃ ॥ ൧൬ ॥
യമുനാപൂരവിധ്വംസീ സ്വഭാസോദ്ഭാസിതവ്രജഃ ।
കൃതാത്മവിദ്യാവിന്യാസോ യോഗമായാഗ്രസമ്ഭവഃ ॥ ൧൭ ॥
ദുര്ഗാനിവേദിതോദ്ഭാവോ യശോദാതല്പശായകഃ ।
നന്ദഗോപോത്സവസ്ഫൂര്തിര്വ്രജാനന്ദകരോദയഃ ॥ ൧൮ ॥
സുജാതജാതകര്മശ്രീര്ഗോപീഭദ്രോക്തിനിര്വൃതഃ ।
അലീകനിദ്രോപഗമഃ പൂതനാസ്തനപീഡനഃ ॥ ൧൯ ॥
സ്തന്യാത്തപൂതനാപ്രാണഃ പൂതനാക്രോശകാരകഃ ।
വിന്യസ്തരക്ഷാഗോധൂലിര്യശോദാകരലാലിതഃ ॥ ൨൦ ॥
നന്ദാഘ്രാതശിരോമധ്യഃ പൂതനാസുഗതിപ്രദഃ ।
ബാലഃ പര്യങ്കനിദ്രാലുര്മുഖാര്പിതപദാങ്ഗുലിഃ ॥ ൨൧ ॥
അഞ്ജനസ്നിഗ്ധനയനഃ പര്യായാങ്കരിതസ്മിതഃ ।
ലീലാക്ഷസ്തരലാലോക ശകടാസുരഭഞ്ജനഃ ॥ ൨൨ ॥
ദ്വിജോദിതസ്വസ്ത്യയനോ മന്ത്രപൂതജലാപ്ലുതഃ ।
യശോദോത്സങ്ഗപര്യങ്കോ യശോദാമുഖവീക്ഷകഃ ॥ ൨൩ ॥
യശോദാസ്തന്യമുദിതസ്തൃണാവര്താദിദുഃസഹഃ ।
തൃണാവര്താസുരധ്വംസീ മാതൃവിസ്മയകാരകഃ ॥ ൨൪ ॥
പ്രശസ്തനാമകരണോ ജാനുചംക്രമണോത്സുകഃ ।
വ്യാലമ്ബിചൂലികാരത്നോ ഘോഷഗോപഃ പ്രഹര്ഷണഃ ॥ ൨൫ ॥
സ്വമുഖപ്രതിബിമ്ബാര്ഥീ ഗ്രീവാവ്യാഘ്രനഖോജ്ജ്വലഃ ।
പങ്കാനുലേപരുചിരോ മാംസലോരുകടിതടഃ ॥ ൨൬ ॥
ഘൃഷ്ടജാനുകരദ്വന്ദ്വഃ പ്രതിബിമ്ബാനുകാരകൃത് ।
അവ്യക്തവര്ണവാഗ്വൃത്തിഃ സ്മിതലക്ഷ്യരദോദ്ഗമഃ ॥ ൨൭ ॥
ധാത്രീകരസമാലമ്ബീ പ്രസ്ഖലച്ചിത്രചംക്രമഃ ।
അനുരൂപവയസ്യാഢ്യശ്ചാരുകൌമാരചാപലഃ ॥ ൨൮ ॥
വത്സപുച്ഛസമാകൃഷ്ടോ വത്സപുച്ഛവികര്ഷണഃ ।
വിസ്മാരിതാന്യവ്യാപാരോ ഗോപഗോപീമുദാവഹഃ ॥ ൨൯ ॥
അകാലവത്സനിര്മോക്താ വ്രജവ്യാക്രോശസുസ്മിതഃ ।
നവനീതമഹാചോരോ ദാരകാഹാരദായകഃ ॥ ൩൦ ॥
പീഠോലൂഖലസോപാനഃ ക്ഷീരഭാണ്ഡവിഭേദനഃ ।
ശിക്യഭാണ്ഡസമാകര്ഷീ ധ്വാന്താഗാരപ്രവേശകൃത് ॥ ൩൧ ॥
ഭൂഷാരത്നപ്രകാശാഢ്യോ ഗോപ്യുപാലമ്ഭഭര്ത്സിതഃ ।
പരാഗധൂസരാകാരോ മൃദ്ഭക്ഷണകൃതേക്ഷണഃ ॥ ൩൨ ॥
ബാലോക്തമൃത്കഥാരമ്ഭോ മിത്രാന്തര്ഗൂഢവിഗ്രഹഃ ।
കൃതസംത്രാസലോലാക്ഷോ ജനനീപ്രത്യയാവഹഃ ॥ ൩൩ ॥
മാതൃദൃശ്യാത്തവദനോ വക്ത്രലക്ഷ്യചരാചരഃ ।
യശോദാലാലിതസ്വാത്മാ സ്വയം സ്വാച്ഛന്ദ്യമോഹനഃ ॥ ൩൪ ॥
സവിത്രീസ്നേഹസംശ്ലിഷ്ടഃ സവിത്രീസ്തനലോലുപഃ ।
നവനീതാര്ഥനാപ്രഹ്വോ നവനീതമഹാശനഃ ॥ ൩൫ ॥
മൃഷാകോപപ്രകമ്പോഷ്ഠോ ഗോഷ്ഠാങ്ഗണവിലോകനഃ ।
ദധിമന്ഥഘടീഭേത്താ കിങ്കിണീക്വാണസൂചിതഃ ॥ ൩൬ ॥
ഹൈയങ്ഗവീനരസികോ മൃഷാശ്രുശ്ചൌര്യശാങ്കിതഃ ।
ജനനീശ്രമവിജ്ഞാതാ ദാമബന്ധനിയന്ത്രിതഃ ॥ ൩൭ ॥
ദാമാകല്പശ്ചലാപാങ്ഗോ ഗാഢോലൂഖലബന്ധനഃ ।
ആകൃഷ്ടോലൂഖലോഽനന്തഃ കുബേരസുതശാപവിത് ॥ ൩൮ ॥
നാരദോക്തിപരാമര്ശീ യമലാര്ജുനഭഞ്ജനഃ ।
ധനദാത്മജസംഘുഷ്ടോ നന്ദമോചിതബന്ധനഃ ॥ ൩൯ ॥
ബാലകോദ്ഗീതനിരതോ ബാഹുക്ഷേപോദിതപ്രിയഃ ।
ആത്മജ്ഞോ മിത്രവശഗോ ഗോപീഗീതഗുണോദയഃ ॥ ൪൦ ॥
പ്രസ്ഥാനശകടാരൂഢോ വൃന്ദാവനകൃതാലയഃ ।
ഗോവത്സപാലനൈകാഗ്രോ നാനാക്രീഡാപരിച്ഛദഃ ॥ ൪൧ ॥
ക്ഷേപണീക്ഷേപണഃ പ്രീതോ വേണുവാദ്യവിശാരദഃ ।
വൃഷവത്സാനുകരണോ വൃഷധ്വാനവിഡമ്ബനഃ ॥ ൪൨ ॥
നിയുദ്ധലീലാസംഹ്രഷ്ടഃ കൂജാനുകൃതകോകിലഃ ।
ഉപാത്തഹംസഗമനഃ സര്വജന്തുരുതാനുകൃത് ॥ ൪൩ ॥
ഭൃങ്ഗാനുകാരീ ദധ്യന്നചോരോ വത്സപുരസ്സരഃ ।
ബലീ ബകാസുരഗ്രാഹീ ബകതാലുപ്രദാഹകഃ ॥ ൪൪ ॥
ഭീതഗോപാര്ഭകാഹൂതോ ബകചഞ്ചുവിദാരണഃ ।
ബകാസുരാരിര്ഗോപാലോ ബാലോ ബാലാദ്ഭുതാവഹഃ ॥ ൪൫ ॥
ബലഭദ്രസമാശ്ലിഷ്ടഃ കൃതക്രീഡാനിലായനഃ ।
ക്രീഡാസേതുനിധാനജ്ഞഃ പ്ലവങ്ഗോത്പ്ലവനോഽദ്ഭുതഃ ॥ ൪൬ ॥
കന്ദുകക്രീഡനോ ലുപ്തനന്ദാദിഭവവേദനഃ ।
സുമനോഽലംകൃതശിരാഃ സ്വാദുസ്നിഗ്ധാന്നശിക്യഭൃത് ॥ ൪൭ ॥
ഗുഞ്ജാപ്രാലമ്ബനച്ഛന്നഃ പിഞ്ഛൈരലകവേഷകൃത് ।
വന്യാശനപ്രിയഃ ശ്രൃങ്ഗരവാകാരിതവത്സകഃ ॥ ൪൮ ॥
മനോജ്ഞപല്ലവോത്തംസപുഷ്പസ്വേച്ഛാത്തഷട്പദഃ ।
മഞ്ജുശിജ്ഞിതമഞ്ജീരചരണഃ കരകങ്കണഃ ॥ ൪൯ ॥
അന്യോന്യശാസനഃ ക്രീഡാപടുഃ പരമകൈതവഃ ।
പ്രതിധ്വാനപ്രമുദിതഃ ശാഖാചതുരചംക്രമഃ ॥ ൫൦ ॥
അഘദാനവസംഹര്താ വ്രജവിഘ്നവിനാശനഃ ।
വ്രജസഞ്ജീവനഃ ശ്രേയോനിധര്ദാനവമുക്തിദഃ ॥ ൫൧ ॥
കാലിന്ദീപുലിനാസീനഃ സഹഭുക്തവ്രജാര്ഭകഃ ।
കക്ഷാജഠരവിന്യസ്തവേണുര്വല്ലവചേഷ്ടിതഃ ॥ ൫൨ ॥
ഭുജസന്ധ്യന്തരന്യസ്തശ്രൃങ്ഗവേത്രഃ ശുചിസ്മിതഃ ।
വാമപാണിസ്ഥദധ്യന്നകവലഃ കലഭാഷണഃ ॥ ൫൩ ॥
അങ്ഗുല്യന്തരവിന്യസ്തഫലഃ പരമപാവനഃ ।
അദൃശ്യതര്ണകാന്വേഷീ വല്ലവാര്ഭകഭീതിഹാ ॥ ൫൪ ॥
അദൃഷ്ടവത്സപവ്രാതോ ബ്രഹ്മവിജ്ഞാതവൈഭവഃ ।
ഗോവത്സവത്സപാന്വേഷീ വിരാട്പുരുഷവിഗ്രഹഃ ॥ ൫൫ ॥
സ്വസംകല്പാനുരൂപാര്ഥോ വത്സവത്സപരൂപധൃക് ।
യഥാവത്സക്രിയാരൂപോ യഥാസ്ഥാനനിവേശനഃ ॥ ൫൬ ॥
യഥാവ്രജാര്ഭകാകാരോ ഗോഗോപീസ്തന്യപഃ സുഖീ ।
ചിരാദ്ബലോ ഹിതോ ദാന്തോ ബ്രഹ്മവിജ്ഞാതവൈഭവഃ ॥ ൫൭ ॥
വിചിത്രശക്തിര്വ്യാലീനഃ സൃഷ്ടഗോവത്സവത്സപഃ ।
ബ്രഹ്മത്രപാകരോ ധാതൃസ്തുതഃ സര്വാര്ഥസാധകഃ ॥ ൫൮ ॥
ബ്രഹ്മ ബ്രഹ്മമയോഽവ്യക്തസ്തേജോരൂപഃ സുഖാത്മകഃ ।
നിരുക്തം വ്യാകൃതിര്വ്യക്തോ നിരാലമ്ബനഭാവനഃ ॥ ൫൯ ॥
പ്രഭവിഷ്ണുരതന്ത്രീകോ ദേവപക്ഷാര്ഥരൂപധൃക് ।
അകാമഃ സര്വവേദാദിരണീയഃ സ്ഥൂലരൂപവാന് ॥ ൬൦ ॥
വ്യാപീ വ്യാപ്യഃ കൃപാകര്താ വിചിത്രാചാരസമ്പതഃ ।
ഛേന്ദോമയഃ പ്രധാനാത്മാ മൂര്താമൂര്തിദ്വയാകൃതീഃ ॥ ൬൧ ॥
അനേകമൂര്തിരക്രോധഃ പരഃ പ്രകൃതിരക്രമഃ ।
സകലാവരണോപേതഃ സര്വദേവോ മഹേശ്വരഃ ॥ ൬൨ ॥
മഹാപ്രഭാവനഃ പൂര്വവത്സവത്സപദര്ശകഃ ।
കൃഷ്ണയാദവഗോപാലോ ഗോപാലോകനഹര്ഷിതഃ ॥ ൬൩ ॥
സ്മിതേക്ഷാഹര്ഷിതബ്രഹ്മാ ഭക്തവത്സലവാക്പ്രിയഃ ।
ബ്രഹ്മാനന്ദാശ്രുധൌതാംഘ്രിര്ലീലാവൈചിത്ര്യകോവിദഃ ॥ ൬൪ ॥
ബലഭദ്രൈകഹ്രദയോ നാമകാരിതഗോകുലഃ ।
ഗോപാലബാലകോ ഭവ്യോ രജ്ജുയജ്ഞോപവീതവാന് ॥ ൬൫ ॥
വൃക്ഷച്ഛായാഹതാശാന്തിര്ഗോപോത്സങ്ഗപബര്ഹണഃ ।
ഗോപസംവാഹിതപദോ ഗോപവ്യജനവീജിതഃ ॥ ൬൬ ॥
ഗോപഗാനസുഖോന്നിദ്രഃ ശ്രീദാമാര്ജിതസൌഹ്രദഃ ।
സുനന്ദസുഹ്രദേകാത്മാ സുബലപ്രാണരഞ്ജനഃ ॥ ൬൭ ॥
താലീവനകൃതക്രീഡോ ബലപാതിതധേനുകഃ ।
ഗോപീസൌഭാഗ്യസമ്ഭാവ്യോ ഗോധൂലിച്ഛുരിതാലകഃ ॥ ൬൮ ॥
ഗോപീവിരഹസംതപ്തോ ഗോപികാകൃതമജ്ജനഃ ।
പ്രലമ്ബബാഹുരുത്ഫുല്ലപുണ്ഡരീകാവതംസകഃ ॥ ൬൯ ॥
വിലാസലലിതസ്മേരഗര്ഭലീലാവലോകനഃ ।
സ്ത്രഗ്ഭൂഷണാനുലേപാഢ്യോ ജനന്യുപഹ്രതാന്നഭുക് ॥ ൭൦ ॥
വരശയ്യാശയോ രാധപ്രേമസല്ലാപനിര്വൃതഃ ।
യമുനാതടസംചാരീ വിഷാര്തവ്രജഹര്ഷദഃ ॥ ൭൧ ॥
കാലിയക്രോധജനകഃ വൃദ്ധാഹികുലവേഷ്ടിതഃ ।
കാലിയാഹിഫണാരങ്ഗനടഃ കാലിയമര്ദനഃ ॥ ൭൨ ॥
നാഗപത്നീസ്തുതിപ്രീതോ നാനാവേഷസമൃദ്ധികൃത് ।
അവിഷാക്തദൃഗാത്മേശഃ സ്വദൃഗാത്മാസ്തുതിപ്രിയഃ ॥ ൭൩ ॥
സര്വേശ്വരഃ സര്വഗുണഃ പ്രസിദ്ധഃ സര്വസാത്വതഃ ।
അകുണ്ഠധാമാ ചന്ദ്രാര്കദൃഷ്ടിരാകാശനിര്മലഃ ॥ ൭൪ ॥
അനിര്ദേശ്യഗതിര്നാഗവനിതാപതിഭൈക്ഷദഃ ।
സ്വാംഘ്രിമുദ്രാങ്കനാഗേന്ദ്രമൂര്ധാ കാലിയസംസ്തുതഃ ॥ ൭൫ ॥
അഭയോ വിശ്വതശ്ചക്ഷുഃ സ്തുതോത്തമഗുണഃ പ്രഭുഃ ।
അഹമാത്മാ മരുത്പ്രാണഃ പരമാത്മാ ദ്യുശീര്ഷവാന് ॥ ൭൬ ॥
നാഗോപായനഹ്രഷ്ടാത്മാ ഹ്രദോത്സാരിതകാലിയഃ ।
ബലഭദ്രസുഖാലാപോ ഗോപാലിങ്ഗനനിര്വൃതഃ ॥ ൭൭ ॥
ദാവാഗ്നിഭീതഗോപാലഗോപ്താ ദാവാഗ്നിനാശനഃ ।
നയനാച്ഛാദനക്രീഡലമ്പടോ നൃപചേഷ്ടിതഃ ॥ ൭൮ ॥
കാകപക്ഷധരഃ സൌമ്യോ ബലവാഹകകേലിമാന് ।
ബലഘാതിതദുര്ധര്ഷപ്രലമ്ബോ ബലവത്സലഃ ॥ ൭൯ ॥
മുഞ്ജാടവ്യഗ്നിശമനഃ പ്രാവൃട്കാലവിനോദവാന് ।
ശിലാന്യസ്താന്നഭൃദ്ദൈത്യസംഹര്താ ശാദ്വലാസനഃ ॥ ൮൦ ॥
സദാപ്തഗോപികോദ്ഗീതഃ കര്ണികാരാവതംസകഃ ।
നടവേഷധരഃ പദ്മമാലാങ്കോ ഗോപികാവൃതഃ ॥ ൮൧ ॥
ഗോപീമനോഹരാപാങ്ഗോ വേണുവാദനതത്പരഃ ।
വിന്യസ്തവദനാമ്ഭോജശ്ചാരുശബ്ദകൃതാനനഃ ॥ ൮൨ ॥
ബിമ്ബാധരാര്പിതദാരുവേണുര്വിശ്വവിമോഹനഃ ।
വ്രജസംവര്ണിതഃ ശ്രാവ്യവേണുനാദശ്രുതിപ്രിയഃ ॥ ൮൩ ॥
ഗോഗോപഗോപീജന്മേപ്സുര്ബ്രഹ്മേന്ദ്രാദ്യഭിവന്ദിതഃ ।
ഗീതസ്ത്രുതിസരിത്പൂരോ നാദനര്തിതബര്ഹിണഃ ॥ ൮൪ ॥
രാഗപല്ലവിതസ്ഥാണുര്ഗീതനമിതപാദപഃ ।
വിസ്മാരിതതൃണഗ്രാസമൃഗോ മൃഗവിലോഭിതഃ ॥ ൮൫ ॥
വ്യാഘ്രാദിഹിംസ്ത്രസഹജവൈരഹര്താ സുഗായനഃ ।
ഗാഢോദീരിതഗോവൃന്ദഃ പ്രേമോത്കര്ണിതതര്ണകഃ ॥ ൮൬ ॥
നിഷ്പന്ദയാനബ്രഹ്മാദിവീക്ഷിതോ വിശ്വവന്ദിതഃ ।
ശാഖോത്കര്ണശകുന്തൌഘശ്ഛത്രായിതവലാഹകഃ ॥ ൮൭ ॥
പ്രസന്നഃ പരമാനന്ദശ്ചിത്രായിതചരാചരഃ ।
ഗോപികാമദനോ ഗോപീകുചകുങ്ഗമമുദ്രിതഃ ॥ ൮൮ ॥
ഗോപകന്യാജലക്രീഡാഹ്രഷ്ടോ ഗോപ്യംശുകാപഹ്രത് ।
സ്കന്ധാരോപിതഗോപസ്ത്രീവാസാഃ കുന്ദനിഭസ്മിതഃ ॥ ൮൯ ॥
ഗോപീനേത്രോത്പലശശീ ഗോപികായാചിതാംശുകഃ ।
ഗോപീനമസ്ക്രിയാദേഷ്ടാ ഗോപ്യേകകരവന്ദിതഃ ॥ ൯൦ ॥
ഗോപ്യഞ്ജലിവിശേഷാര്ഥീ ഗോപക്രീഡാവിലോഭിതഃ ।
ശാന്തവാസസ്ഫുരദ്ഗോപീകൃതാഞ്ജലിരഘാപഹഃ ॥ ൯൧ ॥
ഗോപീകേലിവിലാസാര്ഥീ ഗോപീസമ്പൂര്ണകാമദഃ ।
ഗോപസ്ത്രീവസ്ത്രദോ ഗോപീചിത്തചോരഃ കുതൂഹലീ ॥ ൯൨ ॥
വൃന്ദാവനപ്രിയോ ഗോപബന്ധുര്യജ്വാന്നയാചിതാ ।
യജ്ഞേശോ യജ്ഞഭാവജ്ഞോ യജ്ഞപത്ന്യഭിവാഞ്ഛിതഃ ॥ ൯൩ ॥
മുനിപത്നീവിതീര്ണാന്നതൃപ്തോ മുനിവധൂപ്രിയഃ ।
ദ്വിജപത്ന്യഭിഭാവജ്ഞോ ദ്വിജപത്നീവരപ്രദഃ ॥ ൯൪ ॥
പ്രതിരുദ്ധസതീമോക്ഷപ്രദോ ദ്വിജവിമോഹിതഃ ।
മുനിജ്ഞാനപ്രദോ യജ്വസ്തുതോ വാസവയാഗവിത് ॥ ൯൫ ॥
പിതൃപ്രോക്തക്രിയാരൂപശക്രയാഗനിവാരണഃ ।
ശക്രാഽമര്ഷകരഃ ശക്രവൃഷ്ടിപ്രശമനോന്മുഖ ॥ ൯൬ ॥
ഗോവര്ധനധരോ ഗോപഗോവൃന്ദത്രാണതത്പരഃ ।
ഗോവര്ധനഗിരിഛത്രചണ്ഡദണ്ഡഭുജാര്ഗലഃ ॥ ൯൭ ॥
സപ്താഹവിധൃതാദ്രീന്ദ്രോ മേഘവാഹനഗര്വഹാ ।
ഭുജാഗ്രോപരിവിന്യസ്തക്ഷ്മാധരക്ഷ്മാഭൃദച്യുതഃ ॥ ൯൮ ॥
സ്വസ്ഥാനസ്ഥാപിതഗിരിര്ഗോപീദധ്യക്ഷതാര്ചിതഃ ।
സുമനഃ സുമനോവൃഷ്ടിഹ്രഷ്ടോ വാസവവന്ദിതഃ ॥ ൯൯ ॥
കാമധേനുപയഃപൂരാഭിഷിക്തഃ സുരഭിസ്തുതഃ ।
ധരാംഘ്രിരോഷധീരോമാ ധര്മഗോപ്താ മനോമയഃ ॥ ൧൦൦ ॥
ജ്ഞാനയജ്ഞപ്രിയഃ ശാസ്ത്രനേത്രഃ സര്വാര്ഥസാരഥിഃ ।
എരാവതകരാനീതവിയദ്ഗങ്ഗാപ്ലുതോ വിഭുഃ ॥ ൧൦൧ ॥
ബ്രഹ്മാഭിഷിക്തോ ഗോഗോപ്താ സര്വലോകശുഭംകരഃ ।
സര്വവേദമയോ മഗ്നനന്ദാന്വേഷിപിതൃപ്രിയഃ ॥ ൧൦൨ ॥
വരുണോദീരിതാത്മേക്ഷാകൌതുകോ വരുണാര്ചിതഃ ।
വരുണാനീതജനകോ ഗോപജ്ഞാതാത്മവൈഭവഃ ॥ ൧൦൩ ॥
സ്വര്ലോകാലോകസംഹ്രഷ്ടഗോപവര്ഗത്രിവര്ഗദഃ ।
ബ്രഹ്മഗ്രദ്ഗോപിതോ ഗോപദ്രഷ്ടാ ബ്രഹ്മപദപ്രദഃ ॥ ൧൦൪ ॥
ശരച്ചന്ദ്രവിഹാരോക്തഃ ശ്രീപതിര്വശകഃ ക്ഷമഃ ।
ഭയാപഹോ ഭര്തൃരുദ്ധഗോപികാധ്യാനഗോചരഃ ॥ ൧൦൫ ॥
ഗോപികാനയനാസ്വാദ്യോ ഗോപീനര്മോക്തിനിര്വൃതഃ ।
ഗോപികാമനഹരണോ ഗോപികാശതയൂഥപഃ ॥ ൧൦൬ ॥
വൈജയന്തീസ്ത്രഗാകല്പോ ഗോപികാമാനവര്ധനഃ ।
ഗോപകാന്താസുനിര്ദേഷ്ടാ കാന്തോ മന്മഥമന്മഥഃ ॥ ൧൦൭ ॥
സ്വാത്മാസ്യദത്തതാമ്ബൂലഃ ഫലിതോത്കൃഷ്ടയൌവനഃ ।
വല്ലവീസ്തനസക്താക്ഷോ വല്ലവീപ്രേമചാലിതഃ ॥ ൧൦൮ ॥
ഗോപീചേലാംചലാസീനോ ഗോപീനേത്രാബ്ജഷട്പദഃ ।
രാസക്രീഡാസമാസക്തോ ഗോപീമണ്ഡലമണ്ഡനഃ ॥ ൧൦൯ ॥
ഗോപീഹേമമണിശ്രേണിമധ്യേന്ദ്രമനിരുജ്ജവലഃ ।
വിദ്യാധരേന്ദുശാപഘ്നഃ ശംഖചൂഡശിരോഹരഃ ॥ ൧൧൦ ॥
ശംഖചൂഡശിരോരത്നസമ്പ്രീണിതബലോഽനഘഃ ।
അരിഷ്ടാരിഷ്ടകൃദ്ദുഷ്ടകേശിദൈത്യനിഷൂദനഃ ॥ ൧൧൧ ॥
സരസഃ സസ്മിതമുഖഃ സുസ്ഥിരോ വിരഹാകുലഃ ।
സംകര്ഷണാര്പിതപ്രീതിരക്രൂരധ്യാനഗോചരഃ ॥ ൧൧൨ ॥
അക്രൂരസംസ്തുതോ ഗൂഢോ ഗുണവൃത്ത്യുപലക്ഷിതഃ ।
പ്രമാണഗമ്യസ്തന്മാത്രാഽവയവീ ബുദ്ധിതത്പരഃ ॥ ൧൧൩ ॥
സര്വപ്രമാണപ്രമഥീസര്വപ്രത്യയസാധകഃ ।
പുരുഷശ്ച പ്രധാനാത്മാ വിപര്യാസവിലോചനഃ ॥ ൧൧൪ ॥
മധുരാജനസംവീക്ഷ്യോ രജകപ്രതിഘാതകഃ ।
വിചിത്രാമ്ബരസംവീതോ മാലാകാരവരപ്രദഃ ॥ ൧൧൫ ॥
കുബ്ജാവക്രത്വനിര്മോക്താ കുബ്ജായൌവനദായകഃ ।
കുബ്ജാങ്ഗരാഗസുരഭിഃ കംസകോദണ്ഡഖണ്ഡനഃ ॥ ൧൧൬ ॥
ധീരഃ കുവലയപീഡമര്ദനഃ കംസഭീതികൃത് ।
ദന്തിദന്തായുധോ രങ്ഗത്രാസകോ മല്ലയുദ്ധവിത് ॥ ൧൧൭ ॥
ചാണൂരഹന്താ കംസാരിര്ദേവകീഹര്ഷദായകഃ ।
വസുദേവപദാനമ്രഃ പിതൃബന്ധവിമോചനഃ ॥ ൧൧൮ ॥
ഉര്വീഭയാപഹോ ഭൂപ ഉഗ്രസേനാധിപത്യദഃ ।
ആജ്ഞാസ്ഥിതശചീനാഥഃ സുധര്മാനയനക്ഷമഃ ॥ ൧൧൯ ॥
ആദ്യോ ദ്വിജാതിസത്കര്താ ശിഷ്ടാചാരപ്രദര്ശകഃ ।
സാന്ദീപനികൃതാഭ്യസ്തവിദ്യാഭ്യാസൈകധീഃ സുധീഃ ॥ ൧൨൦ ॥
ഗുര്വഭീഷ്ടക്രിയാദക്ഷഃ പശ്ചിമോദധിപൂജിതഃ ।
ഹതപഞ്ചജനപ്രാപ്തപാഞ്ചജന്യോ യമാര്ചിതഃ ॥ ൧൨൧ ॥
ധര്മരാജജയാനീതഗുരുപുത്ര ഉരുക്രമഃ ।
ഗുരുപുത്രപദഃ ശാസ്താ മധുരാജസഭാസദഃ ॥ ൧൨൨ ॥
ജാമദഗ്നയസമഭ്യര്ച്യോ ഗോമന്തഗിരിസംചരഃ ।
ഗോമന്തദാവശമനോ ഗരുഡാനീതഭൂഷണഃ ॥ ൧൨൩ ॥
ചക്രാദ്യായുധസംശോഭീ ജരാസന്ധമദാപഹഃ ।
സൃഗാലാവനിപാലഘ്നഃ സ്രൃഗാലാത്മജരാജ്യദഃ ॥ ൧൨൪ ॥
വിധ്വസ്തകാലയവനോ മുചുകുന്ദവരപ്രദഃ ।
ആജ്ഞാപിതമഹാമ്ഭോധിര്ദ്വാരകാപുരകല്പനഃ ॥ ൧൨൫ ॥
ദ്വാരകാനിലയോ രുക്മിമാനഹന്താ യദുദ്വഹഃ ।
രുചിരോ രുക്മിണിജാനിഃ പ്രദ്യുമ്നജനകഃ പ്രഭുഃ ॥ ൧൨൬ ॥
അപാകൃതത്രിലോകാര്തിരനിരുദ്ധപിതാമഹഃ ।
അനിരുദ്ധപദാന്വേഷീ ചക്രീ ഗരുഡവാഹനഃ ॥ ൧൨൭ ॥
ബാണാസുരപുരീരോദ്ധാ രക്ഷാജ്വല്നയന്ത്രജിത് ।
ധൂതപ്രമഥസംരമ്ഭോ ജിതമാഹേശ്വരജ്വരഃ ॥ ൧൨൮ ॥
ഷട്ചക്രശക്തിനിര്ജേതാ ഭൂതവേതാലമോഹകൃത് ।
ശമ്ഭുത്രിശൂലജിച്ഛമ്ഭുജമ്ഭണഃ ശമ്ഭുസംസ്തുതഃ ॥ ൧൨൯ ॥
ഇന്ദ്രിയാത്മേന്ദുഹ്രദയഃ സര്വയോഗേശ്വരേശ്വരഃ ।
ഹിരണ്യഗര്ഭഹ്രദയോ മോഹാവര്തനിവര്തനഃ ॥ ൧൩൦ ॥
ആത്മജ്ഞാനനിധര്മേധാകോശസ്തന്മാത്രരൂപവാന് ।
ഇന്ദ്രോഽഗ്നിവദനഃ കാലനാഭഃ സര്വാഗമാധ്വഗഃ ॥ ൧൩൧ ॥
തുരീയഃ സര്വധീസാക്ഷീ ദ്വന്ദ്വാരാമ ആത്മദൂരഗഃ ।
അജ്ഞാതപാരവശ്യശ്രീരവ്യാകൃതവിഹാരവാന് ॥ ൧൩൨ ॥
ആത്മപ്രദീപോ വിജ്ഞാനമാത്രാത്മാ ശ്രീനികേതനഃ ।
ബാണബാഹുവനച്ഛേത്താ മഹേന്ദ്രപ്രീതിവര്ധനഃ ॥ ൧൩൩ ॥
അനിരൂദ്ധനിരോധജ്ഞോ ജലേശാഹ്രതഗോകുലഃ ।
ജലേശവിജയീ വീരഃ സത്രാജിദ്രത്നയാചകഃ ॥ ൧൩൪ ॥
പ്രസേനാന്വേഷണോദ്യുക്തോ ജാമ്ബവദ്ധൃതരത്നദഃ ।
ജിതര്ക്ഷരാജതനയാഹര്താ ജാമ്ബവതീപ്രിയഃ ॥ ൧൩൫ ॥
സത്യഭാമാപ്രിയഃ കാമഃ ശതധന്വശിരോഹരഃ ।
കാലിന്ദീപതിരക്രൂരബന്ധുരക്രൂരരത്നദഃ ॥ ൧൩൬ ॥
കൈകേയീരമണോ ഭദ്രഭര്താ നാഗ്നജിതീധവഃ ।
മാദ്രീമനോഹരഃ ശൈബ്യാപ്രാണബന്ധുരുരുക്രമഃ ॥ ൧൩൭ ॥
സുശീലാദയിതോ മിത്രവിന്ദാനേത്രമഹോത്സവഃ ।
ലക്ഷ്മണാവല്ലഭോ രുദ്ധപ്രാഗ്ജ്യോതിഷമഹാപുരഃ ॥ ൧൩൮ ॥
സുരപാശാവൃതിച്ഛേദീ മുരാരിഃ ക്രൂരയുദ്ധവിത് ।
ഹയഗ്രീവശിരോഹര്താ സര്വാത്മാ സര്വദര്ശനഃ ॥ ൧൩൯ ॥
നരകാസുരവിച്ഛേത്താ നരകാത്മജരാജ്യദഃ ।
പൃഥ്വീസ്തുതഃ പ്രകാശാത്മാ ഹ്രദ്യോ യജ്ഞഫലപ്രദഃ ॥ ൧൪൦ ॥
ഗുണഗ്രാഹീ ഗുണദ്രഷ്ടാ ഗൂഢസ്വാത്മാവിഭൂതിമാന് ।
കവിര്ജഗദുപദ്രഷ്ടാ പരമാക്ഷരവിഗ്രഹഃ ॥ ൧൪൧ ॥
പ്രപന്നപാലനോ മാലീ മഹദ്ബ്രഹ്മവിവര്ധനഃ ।
വാച്യവാചകശക്ത്യര്ഥഃ സര്വവ്യാകൃതസിദ്ധിദഃ ॥ ൧൪൨ ॥
സ്വയമ്പ്രഭുരനിര്വേദ്യഃ സ്വപ്രകാശശ്ചിരന്തനഃ ।
നാദാത്മാ മന്ത്രകോടീശോ നാനാവാദനിരോധകഃ ॥ ൧൪൩ ॥
കന്ദര്പകോടിലാവണ്യഃ പരാര്ഥൈകപ്രയോജകഃ ।
അമരീകൃതദേവൌഘഃ കന്യകാബന്ധമോചനഃ ॥ ൧൪൪ ॥
ഷോഡശസ്ത്രീസഹസ്ത്രേശഃ കാന്തഃ കാന്താമനോഭവഃ ।
ക്രീഡാരത്നാചലാഹര്താ വരുണച്ഛത്രശോഭിതഃ ॥ ൧൪൫ ॥
ശക്രാഭിവന്ദിതഃ ശക്രജനനീകുണ്ഡലപ്രദഃ ।
അദിതിപ്രസ്തുതസ്തോത്രോ ബ്രാഹ്മണോദ്ധുഷ്ടചേഷ്ടനഃ ॥ ൧൪൬ ॥
പുരാണഃ സംയമീ ജന്മാലിപ്തഃ ഷഡ്വിംശകോഽര്ഥദഃ ।
യശസ്യനീതിരാദ്യന്തരഹിതഃ സത്കഥാപ്രിയഃ ॥ ൧൪൭ ॥
ബ്രഹ്മബോധഃ പരാനന്ദഃ പാരിജാതാപഹാരകഃ ।
പൌണ്ഡ്രകപ്രാണഹരണഃ കാശിരാജനിഷൂദനഃ ॥ ൧൪൮ ॥
കൃത്യാഗര്വപ്രശമനോ വിചക്രവധദീക്ഷിതഃ ।
ഹംസവിധ്വംസനഃ സാമ്ബജനകോ ഡിമ്ഭകാര്ദനഃ ॥ ൧൪൯ ॥
മുനിര്ഗോപ്താ പിതൃവരപ്രദഃ സവനദീക്ഷിതഃ ।
രഥീ സാരഥ്യനിര്ദേഷ്ടാ ഫാല്ഗുനഃ ഫാല്ഗുനിപ്രിയഃ ॥ ൧൫൦ ॥
സപ്താബ്ധിസ്തമ്ഭനോദ്ഭുതോ ഹരിഃ സപ്താബ്ധിഭേദനഃ ।
ആത്മപ്രകാശഃ പൂര്ണശ്രീരാദിനാരായണേക്ഷിതഃ ॥ ൧൫൧ ॥
വിപ്രപുത്രപ്രദശ്ചൈവ സര്വമാതൃസുതപ്രദഃ ।
പാര്ഥവിസ്മയകൃത്പാര്ഥപ്രണവാര്ഥപ്രബോധനഃ ॥ ൧൫൨ ॥
കൈലാസയാത്രാസുമുഖോ ബദര്യാശ്രമഭൂഷണഃ ।
ഘണ്ടാകര്ണാക്രിയമൌഢ്യതോഷിതോ ഭക്തവത്സലഃ ॥ ൧൫൩ ॥
മുനിവൃന്ദാദിഭിര്ധ്യേയോ ഘണ്ടാകര്ണവരപ്രദഃ ।
തപശ്ചര്യാപരശ്ചീരവാസാഃ പിങ്ഗജടാധരഃ ॥ ൧൫൪ ॥
പ്രത്യക്ഷീകൃതഭൂതേശഃ ശിവസ്തോതാ ശിവസ്തുതഃ ।
കൃഷ്ണാസ്വയംവരാലോകകൌതുകീ സര്വസമ്മതഃ ॥ ൧൫൫ ॥
ബലസംരമ്ഭശമനോ ബലദര്ശിതപാണ്ഡവഃ ।
യതിവേഷാര്ജുനാഭീഷ്ടദായീ സര്വാത്മഗോചരഃ ॥ ൧൫൬ ॥
സുഭദ്രാഫാല്ഗുനോദ്വാഹകര്താ പ്രീണിതഫാല്ഗുനഃ ।
ഖാണ്ഡവപ്രീണിതാര്ചിഷ്മാന് മയദാനവമോചനഃ ॥ ൧൫൭ ॥
സുലഭോ രാജസൂയാര്ഹോ യുധിഷ്ഠിരനിയോജകഃ ।
ഭീമാര്ദിതജരാസന്ധോ മാഗധാത്മജരാജ്യദഃ ॥ ൧൫൮ ॥
രാജബന്ധനനിര്മോക്താ രാജസൂയാഗ്രപൂജനഃ ।
ചൈദ്യാദ്യസഹനോ ഭീഷ്മസ്തുതഃ സാത്വതപൂര്വജഃ ॥ ൧൫൯ ॥
സര്വാത്മാര്ഥസമാഹര്താ മന്ദരാചലധാരകഃ ।
യജ്ഞാവതാരഃ പ്രഹ്ലാദപ്രതിജ്ഞാപരിപാലകഃ ॥ ൧൬൦ ॥
ബലിയജ്ഞസഭാധ്വംസീ ദൃപ്തക്ഷത്രകുലാന്തകഃ ।
ദശഗ്രീവാന്തകോ ജേതാ രേവതീപ്രേമവല്ലഭഃ ॥ ൧൬൧ ॥
സര്വാവതാരാധിഷ്ഠാതാ വേദബാഹ്യവിമോഹനഃ ।
കലിദോഷനിരാകര്താ ദശനാമാ ദൃഢവ്രതഃ ॥ ൧൬൨ ॥
അമേയാത്മാ ജഗത്സ്വാമീ വാഗ്മീ ചൈദ്യശിരോഹരഃ ।
ദ്രൌപദീരചിതസ്തോത്രഃ കേശവഃ പുരുഷോത്തമഃ ॥ ൧൬൩ ॥
നാരായണോ മധുപതിര്മാധവോ ദോഷവര്ജിതഃ ।
ഗോവിന്ദഃ പുണ്ഡരീകാക്ഷോ വിഷ്ണുശ്ച മധുസൂദനഃ ॥ ൧൬൪ ॥
ത്രിവിക്രമസ്ത്രിലോകേശോ വാമനഃ ശ്രീധരഃ പുമാന് ।
ഹ്രഷീകേശോ വാസുദേവഃ പദ്മനാഭോ മഹാഹ്രദഃ ॥ ൧൬൫ ॥
ദാമോദരശ്ചതുര്വ്യൂഹഃ പാഞ്ചാലീമാനരക്ഷണഃ ।
ശാല്വഘ്നഃ സമരശ്ലാഘീ ദന്തവക്ത്രനിബര്ഹണഃ ॥ ൧൬൬ ॥
ദാമോദരപ്രിയസഖഃ പൃഥുകാസ്വാദനപ്രിയഃ ।
ഘൃണീ ദാമോദരഃ ശ്രീദോ ഗോപീപുനരവേക്ഷകഃ ॥ ൧൬൭ ॥
ഗോപികാമുക്തിദോ യോഗീ ദുര്വാസസ്തൃപ്തികാരകഃ ।
അവിജ്ഞാതവ്രജാകീര്ണപാണ്ഡവാലോകനോ ജയീ ॥ ൧൬൮ ॥
പാര്ഥസാരഥ്യനിരതഃ പ്രാജ്ഞഃ പാണ്ഡവദൌത്യകൃത് ।
വിദുരാതിഥ്യസംതുഷ്ടഃ കുന്തീസംതോശദായകഃ ॥ ൧൬൯ ॥
സുയോധനതിരസ്കര്താ ദുര്യോധനവികാരവിത് ।
വിദുരാഭിഷ്ടുതോ നിത്യോ വാര്ഷ്ണേയോ മങ്ഗലാത്മകഃ ॥ ൧൭൦ ॥
പഞ്ചവിംശതിതത്ത്വേശശ്ചതുര്വിംശതിദേഹഭാക് ।
സര്വാനുഗ്രാഹകഃ സര്വദാശാര്ഹസതതാര്ചിതഃ ॥ ൧൭൧ ॥
അചിന്ത്യോ മധുരാലാപഃ സാധുദര്ശീ ദുരാസദഃ ।
മനുഷ്യധര്മാനുഗതഃ കൌരവേന്ദ്രക്ഷയേക്ഷിതഃ ॥ ൧൭൨ ॥
ഉപേന്ദ്രോ ദാനവാരാതിരുരുഗീതോ മഹാദ്യുതിഃ ।
ബ്രഹ്മണ്യദേവഃ ശ്രുതിമാന് ഗോബ്രാഹ്മണഹിതാശയഃ ॥ ൧൭൩ ॥
വരശീലഃ ശിവാരമ്ഭഃ സുവിജ്ഞാനവിമൂര്തിമാന് ।
സ്വഭാവശുദ്ധഃ സന്മിത്രഃ സുശരണ്യഃ സുലക്ഷണഃ ॥ ൧൭൪ ॥
ധൃതരാഷ്ട്രഗതോ ദൃഷ്ടിപ്രദഃ കര്ണവിഭേദനഃ ।
പ്രതോദധൃഗ്വിശ്വരൂപവിസ്മാരിതധനഞ്ജയഃ ॥ ൧൭൫ ॥
സാമഗാനപ്രിയോ ധര്മധേനുര്വണോത്തമോഽവ്യയഃ ।
ചതുര്യുഗക്രിയാകര്താ വിശ്വരൂപപ്രദര്ശകഃ ॥ ൧൭൬ ॥
ബ്രഹ്മബോധപരിത്രാതപാര്ഥോ ഭീഷ്മാര്ഥചക്രഭൃത് ।
അര്ജുനായാസവിധ്വംസീ കാലദംഷ്ട്രാവിഭൂഷണഃ ॥ ൧൭൭ ॥
സുജാതാനന്തമഹിമാ സ്വപ്രവ്യാപാരിതാര്ജുനഃ ।
അകാലസന്ധ്യാഘടനശ്ചക്രാന്തരിതഭാസ്കരഃ ॥ ൧൭൮ ॥
ദുഷ്ടപ്രമഥനഃ പാര്ഥപ്രതിജ്ഞാപരിപാലകഃ ।
സിന്ധുരാജശിരഃപാതസ്ഥാനവക്താ വിവേകദൃക ॥ ൧൭൯ ॥
സുഭദ്രാശോകഹരണോ ദ്രോണോത്സേകാദിവിസ്മിതഃ ।
പാര്ഥമന്യുനിരാകര്താ പാണ്ഡവോത്സവദായകഃ ॥ ൧൮൦ ॥
അങ്ഗുഷ്ഠാക്രാന്തകൌന്തേയരഥചക്രോഽഹിശീര്ഷജിത് ।
കാലകോപപ്രശമനോ ഭീമസേനജയപ്രദഃ ॥ ൧൮൧ ॥
അശ്വത്ഥമവധായാസത്രാതപാണ്ഡുസുതഃ കൃതീ ।
ഇഷീകാസ്ത്രപ്രശമനോ ദ്രൌണിരക്ഷാവിചക്ഷണഃ ॥ ൧൮൨ ॥
പാര്ഥാപഹാരിതദ്രൌണിചൂഡാമണിരഭംഗുരഃ ।
ധൃതരാഷ്ട്രപരമൃഷ്ടഭീമപ്രതികൃതിസ്മയഃ ॥ ൧൮൩ ॥
ഭീഷ്മബുദ്ധിപ്രദഃ ശാന്തഃ ശരച്ചന്ദ്രനിഭാനനഃ ।
ഗദാഗ്രജന്മാ പാഞ്ചാലീപ്രതിജ്ഞാപരിപാലകഃ ॥ ൧൮൪ ॥
ഗാന്ധാരീകോപദൃഗ്ഗുപ്തധര്മസൂനുരനാമയഃ ।
പ്രപന്നാര്തിഭയച്ഛേത്താ ഭീഷ്മശല്യവ്യഥാപഹഃ ॥ ൧൮൫ ॥
ശാന്തഃ ശാന്തനവോദീര്ണഃ സര്വധര്മസമാഹിതഃ ।
സ്മാരിതബ്രഹ്മവിദ്യാര്ഥപ്രീതപാര്ഥോ മഹാസ്ത്രവിത് ॥ ൧൮൬ ॥
പ്രസാദപരമോദാരോ ഗാങ്ഗേയസുഗതിപ്രദഃ ।
വിപക്ഷപക്ഷക്ഷയകൃത്പരീക്ഷിത്പ്രാണരക്ഷണഃ ॥ ൧൮൭ ॥
ജഗദ്ഗുരുര്ധര്മസൂനോര്വാജിമേധപ്രവര്തകഃ ।
വിഹിതാര്ഥ ആപ്തസത്കാരോ മാസകാത്പരിവര്തദഃ ॥ ൧൮൮ ॥
ഉത്തങ്കഹര്ഷദാത്മീയദിവ്യരൂപപ്രദര്ശകഃ ।
ജനകാവഗതസ്വോക്തഭാരതഃ സര്വഭാവനഃ ॥ ൧൮൯ ॥
അസോഢ്യാദവോദ്രേകോ വിഹിതാപ്താദിപൂജനഃ ।
സമുദ്രസ്ഥാപിതാശ്ചര്യമുസലോ വൃഷ്ണിവാഹകഃ ॥ ൧൯൦ ॥
മുനിശാപായുധഃ പദ്മാസനാദിത്രിദശാര്ഥിതഃ ।
സൃഷ്ടിപ്രത്യവഹാരോത്കടസ്വധാമഗമനോത്സുകഃ ॥ ൧൯൧ ॥
പ്രഭാസാലോകനോദ്യുക്തോ നാനാവിധനിമിത്തകൃത് ।
സര്വയാദവസംസേവ്യഃ സര്വോത്കൃഷ്ടപരിച്ഛദഃ ॥ ൧൯൨ ॥
വേലാകാനനസംചാരീ വേലാനിലഹ്രതശ്രമഃ ।
കാലത്മാ യാദവോഽനന്തഃ സ്തുതിസംതുഷ്ടമാനസഃ ॥ ൧൯൩ ॥
ദ്വിജാലോകനസംതുഷ്ടഃ പുണ്യതീര്ഥമഹോത്സവഃ ।
സത്കാരാഹ്ലാദിതാശേഷഭൂസുരഃ സുരവല്ലഭഃ ॥ ൧൯൪ ॥
പുണ്യതീര്ഥാപ്ലുതഃ പുണ്യഃ പുണ്യദസ്തീര്ഥപാവനഃ ।
വിപ്രസാത്കൃതഗോകോടിഃ ശതകോടിസുവര്ണദഃ ॥ ൧൯൫ ॥
സ്വമായാമോഹോതാഽശേഷവ്രുഷ്ണിവീരോ വിശേഷവിത് ।
ജലജായുധനിര്ദേഷ്ടാ സ്വാത്മാവേശിതയാദവഃ ॥ ൧൯൬ ॥
ദേവതാഭീഷ്ടവരദഃ കൃതകൃത്യഃ പ്രസന്നധീഃ ।
സ്ഥിരശേഷായുതബലഃ സഹസ്ത്രഫണിവീക്ഷണഃ ॥ ൧൯൭ ॥
ബ്രഹ്മവൃക്ഷവരച്ഛായാസീനഃ പദ്മാസനസ്ഥിതഃ ।
പ്രത്യഗാത്മാ സ്വഭാവാര്ഥഃ പ്രണിധാനപരായണഃ ॥ ൧൯൮ ॥
വ്യാധേഷുവിദ്ധപൂജ്യാംഘ്രിര്നിഷാദഭയമോചനഃ ।
പുലിന്ദസ്തുതിസംതുഷ്ടഃ പുലിന്ദസുഗതിപ്രദഃ ॥ ൧൯൯ ॥
ദാരുകാര്പിതപാര്ഥാദികരണീയോക്തിരീശിതാ ।
ദിവ്യദുന്ദുഭിസംയുക്തഃ പുഷ്പവൃഷ്ടിപ്രപൂജിതഃ ॥ ൨൦൦ ॥
പുരാണഃ പരമേശാനഃ പൂര്ണഭൂമാ പരിഷ്ടുതഃ ।
പതിരാദ്യഃ പരം ബ്രഹ്മ പരമാത്മാ പരാത്പരഃ ॥ ൨൦൧ ॥
॥ ശ്രീപരമാത്മാ പരാത്പര ൐ നമ ഇതി ॥
॥ ഫലശ്രുതിഃ ॥
ഇദം സഹസ്ത്രം കൃഷ്ണസ്യ നാമ്നാം സര്വാര്ഥദായകമ് ।
അനന്തരൂപീ ഭഗവാന് വ്യാഖ്യാതാദൌ സ്വയമ്ഭുവേ ॥ ൨൦൨ ॥
തേനേ പ്രോക്തം വസിഷ്ഠായ തതോ ലബ്ധ്വാ പരശരഃ ।
വ്യാസായ തേന സമ്പ്രോക്തം ശുകോ വ്യാസാദവാപ്തവാന് ॥ ൨൦൩ ॥
തച്ഛിഷ്യൈര്ബഹുഭിര്ഭൂമൌ ഖ്യാപിതം ദ്വാപരേ യുഗേ ।
കൃഷ്ണാജ്ഞയാ ഹരിഹരഃ കലൌ പ്രഖ്യാപയദ്വിഭുഃ ॥ ൨൦൪ ॥
ഇദം പഠതി ഭക്ത്യാ യഃ ശൃണോതി ച സമാഹിതഃ ।
സ്വസിദ്ധ്യൈ പ്രാര്ഥയന്ത്യേനം തീര്ഥക്ഷേത്രാദിദേവതാഃ ॥ ൨൦൫ ॥
പ്രായശ്ചിത്താന്യശേഷാണി നാലം യാനി വ്യപിഹിതുമ് ।
താനി പാപാനി നശ്യന്തി സകൃദസ്യ പ്രശംസനാത് ॥ ൨൦൬ ॥
ഋണത്രയവിമുക്തസ്യ ശ്രൌതസ്മാര്താനുവര്തിനഃ ।
ഋഷേസ്ത്രിമൂര്തിരൂപസ്യ ഫലം വിന്ദേദിദം പഠന് ॥ ൨൦൭ ॥
ഇദം നാമസഹസ്ത്രമ യഃ പഠത്യേതച്ഛൃണോതി ച ।
ശിവലിങ്ഗസഹസ്ത്രസ്യ സ പ്രതിഷ്ഠാഫലം ലഭേത് ॥ ൨൦൮ ॥
ഇദം കിരീടീ സംജപ്യ ജയീ പാശുപതാസ്ത്രഭാക് ।
കൃഷ്ണസ്യ പ്രാണഭൂതഃ സന് കൃഷ്ണം സാരഥിമാപ്തവാന് ॥ ൨൦൯ ॥
ദ്രൌപദ്യാ ദമയന്ത്യാ ച സാവിത്ര്യാ ച സുശീലയാ ।
ദുരിതാനി ജിതാന്യേതജ്ജപാദാപ്തം ച വാഞ്ഛിതമ് ॥ ൨൧൦ ॥
കിമിദം ബഹുനാ ശംസന്മാനവോ മോദനിര്ഭരഃ ।
ബ്രഹ്മനന്ദമവാപ്യാന്തേ കൃഷ്ണസായുജ്യമാപ്നുയാത് ॥ ൨൧൧ ॥
॥ ഇതി ശ്രീവിഷ്ണുധര്മോത്തരപുരാണേ ശ്രീകൃഷ്ണസഹസ്ത്രനാമസ്തോത്രം സമ്പൂര്ണമ് ॥